LEGAZPI CITY- Liwat na aarangkada an pagpapadagos kan pagdangog sa Kamara katakod kan suboot iregularidad sa isinagibong bidding process sa pagpapaconstruir kan Bicol International Airport sa Albay, sa Enero 2019.
Ipighayag ni Ako Bicol Party-list Representative Alfredo Garbin Jr. sa intrevista kan Bombo Radyo Legazpi na kapot na an findings kan imbestigasyon kan Government Procurement Board (GPB) kun sain pigsasabing ipig-award an proyekto sa contractor na enot pa sanang diskwalipikado na sa bidding.
Segun ki Garbin na susog sa report kan GPB, dakol an negative slippage o mga dae natatapos na patrabaho sa ibang departamento kan JD Legazpi na kaibanan sa joint venture kan Jose Cuerpo para sa ipigcoconstuir na airport terminal.
Napag-araman na an nasabing contractor man an nagtrabaho kan mga palyadong health stations na kadaklan an dae natapos mantang mismong an Department of Public Works and Highways (DPWH) an nagtao kan datos sa maraot na reputasyon kaini.
Dugang pa ni Garbin na komon na pigkukua sana kan mga ini an mobilization fees mantang pigteterminate an kontrata sa manlain-lain na problemang pisikal siring kan suboot terorismo, maraot na panahon asin iba pang rason na garing may pattern na suboot.
Mientras tanto, nagtutubod an lehislador na an bako tamang pagpupuon kan proyekto an rason man kun nata dae pa nakokompleto an halot na kutang operationan na erpuerto.
