Nagpagirumdom nin mga safety tips an Basta Driver Safety Enforcer para sa mga biyaheros ngonian na papaabot na Undas.
Segun ki Ronel Nebres, Chairman kan Basta Driver Safety Enforcer sa intrevista kan Bombo Radyo Legazpi, kaipuhan na siguraduhon na nasa kundisyon an mga lunadan asin an mga driver mismo lalo na sa mga hararayong biyahe.
Dagdag pa kaini, sa pag-parking isegurar na naka-lock an mga pinto asin kun pwede may mawalatan na tawo sa laog kan awto, asin dae magdara nin importanteng bagay na pwedesir pag-interesan kan mga kawatan.
Para sa mga commuter na maduman sa sementeryo, pinagirumduman kaini na bantayan nin maray an kwarta asin gadgets asin riparohon an mga bag.
Pig-omaw man ni Nebres an mga paalala kan pulisya sa mga mataong lugar alagad naobserbaran kaini na kadaklan sa mga tawo an dae interesado asin dae nagdadangog sa mga ini, na dapat intindihon ta para sa saindang kaligtasan.
Segun sa iya, kadaklan sa mga nagiging biktima nin dukot asin snatch, dawa sa laog kan sasakyan asin sa pampublikong merkado, huli sa kapabayaan sa sadiri.
Dagdag pa kaini, halos 90% kan mga nawawalang cellphone asin wallet an dae na nakukua kun bako man sana na driver an nakakua, kun kaya mas maray na magdoble ingat an gabos.
