Inapod na fake news kan Malakanyang an mga nagluwasan na bareta na inisnab ni US President Donald Trump si President Ferdinand Marcos Jr kan maghilingan an duwa sa lubong ni Pope Francis sa Vatican kan nakaaging Sabado.
Segun kay Palace Press Officer USec. Claire Castro na base sa mga nakuwang video asin ladawan an warang isnaban an nangyari.
An pahayag ni Castro an kasunod sa mga naglalakop na bareta na inisnab ni Trump si Presidente Marcos.
Mahihiling sa ladawan na nagkaigwa nin halikpot na pag-oolay si Trump asin Presidente Marcos.
Nagluwas man an Presidential Communications Office nin ladawan bilang patunay na nagkaigwa nin halikpot na pag-oolay si Trump asin Presidente Marcos.
Siring man an pigtaram ni Castro na dae pa ninda aram kun ano an napag-olayan kan duwang lider.
Sinabi ni Castro na aaramon niya an detalye kapag nagka-olay na sinda ni Presidente Marcos.
Afuera kay Trump nahiling man na nagkaigwa man nin halikpot na pag-oolay si Presidente Marcos kay dating US President Joe Biden.
