LEGAZPI CITY – Nangengenot sa laog kan pitong taon an Barangay Dap-Dap, Legazpi City sa Provincial Best Ecological Solid Waste Management sa enterong Albay.
Segun kay Kapitan Glenn Barcelon sa intrevista kan Bombo Radyo Legazpi na an saindang barangay an pignominate kan gobyerno lokal kan Legazpi kan nagkaigwang search an Gobierno Provincial kan Albay para sa best implementation kan ecological solid waste management.
Dakulang tabang man an pagkasararo kan mga residente sa pag-implementar kan programa lalo na pag-abot sa pagmantenir sa kagayunan asin kalinigan kan Barangay.
Maswerte an saindang barangay nin huli ta nakaigwa nin kooperasyon an saindang mga nasasakupan nganing maipadagos an saindang programa hasta sa nag abot nin pitong taon napapaotob ini.
Pigtaram man ni Barcelon na nag-aagi sa mahigot na proseso an saindang barangay sa tamang pag dispose kan basura sa paagi kan saindang “Basura mo, Segragate mo” ordinance.
Pigtawan doon kaini an importansya kan komunikasyon kan mga barangay official sa saindang nasasakupan nganing maaraman kan mga ini na seryoso sinda sa pagpapaotob kan saindang mandato.
Sa presente, padagos man suboot an saindang programa nganing malinig an mga salog asin katubigan nin huli ta kadakol an basura na nag-aanod pasiring sa saindang salog na hale sa mga barangay sa Munisipalidad kan Daraga.
Pangapodan kaini sa mga Barangay Official na sunudon an pigpapaotob kan gobyerno sa pagmamantenir kan kalinigan asin ipahiling sa saindang mga nasasakupan an saindang pagigin seryoso sa mga programang piggigibo nganing sumunod an mga ka-barangay.
