LEGAZPI CITY – Piglalaoman na mas makusog pa si Bagyong Tino mantang paparani sa kadagaan kan Pilipinas sa mga masunod na oras.
Pigkokonsidera ni Catanduanes weather specialist Jun Pantino sa intrevista kan Bombo Radyo Legazpi na mas makusog si Tino kompara sa mga nakaaging bagyong tuminama sa nacion.
Dae man pighahale kan state weather bureau an posibilidad na magsakat an nasabing raot nin panahon sa super typhoon category huli sa mainit na temperatura kan kadagatan na saiyang pig-aagihan.
Piglalaoman man na mamatean an epekto kan bagyo sa rehiyon Bicol poon hapon sagkod sa aldaw nin martes urog na an mga pag-uuran asin pagkusog kan duros.
Pigkompirmar man kan opisyal na may pagkakapareho an track ni Severe Tropical Storm Tino sa Super typhoon Yolanda kan 2013 alagad may pagkakaiba an kusog kan duwa kabale na an pagbabago sa basehan nganing magsakat sa panibagong category an sarong bagyo.
Pigdoon niya man na dae suboot magpakampante an mga bikolano huli ta may posibilidad na magbago pa an direksyon kaini urog nang nasa kadagatan pa ini asin dae pa nagla-land fall.
Pagirumdom ni Pantino sa publiko na mag-ingat man liwat maski dae man direktang matama sa kabikolan an Bagyong Tino alagad madara man giraray ini nin makukusog na mga pag-uuran na pwedesir magkawsa nin pagbabaha asin pagrasay nin daga.
