LEGAZPI CITY-Inapod na ‘marites’ o nagtatao nin bako beripikadong impormasyon ni Senator Rodante Marcoleta si Department of Justice Secretary Frederick Vida katakod kan suboot pagkakadakop kan dating kongresista asin puganteng si Zaldy Co sa Czech Republic.
Nagtutubod si Marcoleta na si Vida an nagtao nin bako beripikadong impormasyon kay President Ferdinand Marcos Jr., na nadakop na si Co sa Czech Republic kun kaya hinagad suboot kan kalihim sa Presidente na personal na magduman sa nasambitang ancoin ngani kumpirmaron an pagkakadakop kay Co.
Dangan na pigkwestyon ni Marcoleta an pagbisita kan mga opisyales kan Departament of Justice sa Czech Republic. Sinabi pa niya na kun talagang nadakop si Co sa abroad, dapat suboot na tulos i-implementar an pig-aapod na consular notification process, kun sain pig-aaram kan embahada kan nacion kun sisay an persona, rason kan pagkaka-detene, lugar kun sain nakakulong, siring man an mga masunod na legal na lakdang.
Segun sa senador, pwedisir makuwa an impormasyon sa Czech Embassy sa Pilipinas, asin kinwestyun niya man an pagbiyahe kan opisyal sa lugar.
Sinabi pa niya na kun igwang opisyal na impormasyon mapadapit sa pigsasabing pagkakaaresto kay Co, dapat na ipinaluwa na ini sa publiko ngani maibitaran an pagdududa.
Sa presente, wara pang opisyal na kumpirmasyon hale sa mga otoridad kan Czech Republic mapadapit sa nai-report na pagkakadetine ni Co.
