LEGAZPI CITY-Ipighayag ni Department of Finance Secretary Frederick Go na nagsadit an fiscal space kan kadakol na developing economies kun kaya nadidifisilan sindang tugunana an sabay-sabay na krisis.
Huli digdi, kinakaipuhan kan Pilipinas nin suporta para sa paggibo nin mga trabaho, mas flexible na financing, asin pagpapakusog kan climate resilience sa tahaw kan nagtitinding angat dara kan geopolitical tensions asin climate-related risks.
Segun pa sa kalihim, kaipuhan man an “scaled-up and more flexible financing,” kabale an budget support asin emergency funding mechanisms ngani matabangan an mga nacion na makaagapay sa external shocks mantang padagos an serbisyo publiko asin iba pang programa.
Pig-eenganyar man ni Go an mas mahewas na partisipasyon kan pribadong sektor na mamuhunan, partikular sa imprastraktura, energy transition asin digital services kun sain pighihiling an susi sa paggibo nin trabaho asin pagusbong kan ekonomiya.
Tinawan doon man niya an importansya kan human capital development ngani masierto an mga repormang pang-ekonomiya, na direktang matao nin dekalidad na trabaho asin mas maayos na kabuhayan.
Pangapudan man niya na kaipuhan nin access sa climate financing asin technical assistance, orog na para sa Pilipinas na permihang pig-aagihan nin makukusog na bagyo asin iba pang kalamidad.
Isinagibo ninda an pag-oolay sa Intergovernmental Group of Twenty-Four (G-24) Ministers’ and Governors’ Meeting, na sarong grupo kun sain an mga developing countries igwang kakayahang pag-olayan an mga isyu sa International Financing asin iba pa.
