LEGAZPI CITY – Marikas na naghihiro si Tropical Depression Ramil mantang paparani sa kadagaan kan rehiyon Bicol.
Segun ki Masbate weather Specialist Christian Allen Torevillas sa intrevista kan Bombo Radyo Legazpi na huli sa nasambitang bagyo an laoman na ngonian na aldaw an makukusog na pag-uuran partikulamente na sa mga provincia kan Albay, Sorsogon, Catanduanes, asin Masbate.
Maabot man suboot sa 50mm sagkod 100mm na pag-uran an sa Albay asin Sorsogon mantang 100mm sagkod 200mm na pag-uuran man an mamamatean sa Camarines Norte, Camarines Sur, asin Catanduanes na madurar sagkod sa pagka-udto nin dominggo, Oktubre 19.
Pigdugang pa niya na posible man na dominggong hapon an magigin maray na an kamugtakan kan panahon sa rehiyon kan bikol.
Pigtaram pa kan nasambitang weather specialist na piglalaoman na ma-landfall si bagyong Ramil sa isla kan Catanduanes saagang hapon (Oct. 18) alagad pwedesir pa ining maglihis nin direksyon sa mga masunod na oras.
Inabisuhan niya man an publiko asin an Disaster Risk Reduction and Management Offices na maglatag nin lakdang nganing ma-protektaran an saindang nasasakupan.
Pighayag ni Torevillas na permihang mag-antabay sa mga state weather bureau mapadapit sa presenteng kamugtakan kan panahon asin dae magduwang isip na mag-ebakwar enkaso ipa-otob na ini kan otoridad.
