LEGAZPI CITY- Padagos ngunyan an pag-update kan Albay Public Safety and Emergency Management Office kan population at risk sa provincia.
Segun ki APSEMO Research Division Head Eugene Escobar sa intrevista kan Bombo Radyo Legazpi na natapos na an pag-update sa ciudad kan Tabaco asin banwaan kan Malilipot.
Katakod kaini, maglilibot pa an ahensya sa iba pang mga banwaan na nasa laog kan 6km radius permanent danger zone kan bulkang Mayon.
Kaibanan sa mga ini an ciudad kan Legazpi asin Ligao siring man an mga banwaan kan Camalig asin Daraga.
Paliwanag kan opisyal na obheto kan makukuwang datos na maggamit sa plano kan provincia para sa pagkakaigwa nin permanenteng relocation site.
Ini an nahihiling na long term solution kan ahensya ngani na matawan nin tsansa an mga benepisyaryo na ma-relocate asin magkaigwa nin permanenteng istaran ngani na dae na maapektaran kada nag-aalburuto an bulkang Mayon.
Target na matapos an pagtitipon kan datos sa laog nin tulong bulan, alagad posible suboot ining mapalawig depende sa dae pinaglalaoman na sitwasyon kan panahon.
Mientras tanto, sinabi pa kan opisyal na dakulang tabang man an mga naka install na rain gauges sa palibot kan bulkang Mayon ngani na masukol na volume kan uran, asin makapagtaong patanid sa publiko enkasong may peligro sa pagdausdos kan lahar.
