LEGAZPI CITY- Inapod kan Albay Schools Division na napapanahon sana an pagsuspinde kan klase sa elementarya asin sekondarya sa pampubliko asin pribadong eskwelahan sa provincia huli ta magseserbi ining interbensyon sa salud kan mga kaakian.
Marurumduman na puon Setyembre 14 hasta 16 an wellness break asin idikeklarar asin sisuspinder man an klase sa Setyembre 17 hasta 18 ngani na matawan dalan an paglilinig sa mga eskwelahan ngani na makontrol an naglalangkaw na kaso kan dengue.
Segun ki Albay Schools Division Spokesperson Froilan Tena sa intrevista kan Bombo Radyo Legazpi na padagos na nag-iisip nin paagi an mga school heads kun papano masi-sierto na salbado an mga eskwelahan.
Nakikipagtabangan man suboot an dibisyon sa mga lakdang kan gobierno provincial ngani na mairayo an mga kaakian sa nasabing kamatean.
Marurumduman na sa nakalihis na mga aldaw, nagkaigwa na nin fogging operations an mga lokal na gobierno sa mga kaharungan asin mga eskwelahan ngani na maibitaran an paglangkaw pa kan mga kaso nin dengue sa provincia.
