Pinahimutikan ni Presidente Ferdinand Marcos Jr. na sarong staged drama sana an pag-arestar sa saiyang pinsan na si dating House Speaker asin Leyte Rep. Martin Romualdez katakod kan kontrobersyal na P7.4-bilyong plunder case.
Segun ki Marcos, an mga nagsasabi na drama sana an nangyaring pag-arestar an partre kan mga politikal na pag-atake kontra a saiyang administrasyon asin dae nagsasaladawan kan aktwal na proseso na naga-iral sa korte.
Marurumduman na naarestar si Romualdez makalihis magpaluwas nin opisyal na warrant of arrest an Sandiganbayan basado sa kasong isinunad kan Office of the Ombudsman.
Presente ining nagtetenir sa Philippine General Hospital para sa mga independent medical examination makalihis ilipat hali sa Cardinal Santos Medical Center.
Mientras tanto, tinawan duon ni Interior Secretary Jonvic Remulla na dae nakiaram an presidente sa nagin pag-arestar sa dating house speaker.
Inako man kan kalihim na makulog para sa presidente an mga nangyayari huli sa pagigin ugos kan duwa, alagad ipinaliwanag na parte ini kan kaipuhan na otobon na mandato kan gobierno asin an pagpapaotob nin ley.
