LEGAZPI CITY – Ipinaotob na kan Albay Schools Division Office an Alternative Learning Modality sa pirang eskwelahan na apektado kan pag-aalburuto kan Bulkan Mayon.
Segun ki SDO Albay Division Disaster Risk Reduction and Management (DRRM) Coordinator Alvin Cruz sa intrevista kan Bombo Radyo Legazpi na pig-implementar na an naunambitang lakdang sa pirang eskwelahan sa Malilipot, asin Camalig na ginibong evacuation centers.
Kadaklan suboot sa mga eskwelahan an nagsasairarom sa modular mantang blended learning man sa mga eskwelahan na may abilable pang mga classroom na pwedesir gibuhan nin face-to-face classes.
Nagbarewas na man an saindang ofisina nin learning kits para sa mga estudyanteng nakatenir sa evacuation center nganing dae man mapundo an saindang pagkanuod mantang bond paper, printer, asin ink para sa mga paratukdo na magagamit para sa paggibo nin mga module.
Dae man pighahale kan opisyal an posibilidad na kadakol sa mga eskwelahan sa provincia kan Albay an magagamit bilang evacuation centers kun enkaso maglala an sitwasyon kan Bulkan urog na kun magsakat sa level 4 an alert level status kaini.
Kun pagbabasehan kaya suboot an mga historical data kan mga nakaaging pagtuga man kan Mayon, pwedesir na umabot sa 41 eskwelahan an magagamit bilang evacuation centers nganing paramientras na teniran kan mga residentes.
Nagmamawot man si Cruz na dae na maglala an sitwasyon kan Bulkan Mayon nganing dae man labing mapilay an sektor kan edukasyon sa provincia kan Albay.
