LEGAZPI CITY- Nakaguno nin mga local asin foreign investors an katatapos pa sanang Albay Renewable Energy and Investment Summit.
Pigtukar sa naunambitang summit an manungod sa futuro kan renewable energy asin pagpapatindog nin mga solar farm sa enterong probinsya.
Sa impormasyon na nakalap kan Bombo Radyo Legazpi, tinawan doon kan gobyerno probinsyal kan Albay na makakatabang an renewable energy sa lalawigan sa taong 2032 nin huli ta nagtatao ini nin mas hibabang bayadan sa kuryente asin mas malinig na futuro para sa mga albayano.
Mientrastanto, nakakuwa man nin mga pledges an gobyerno probinsyal kan Albay na nangkakantidad nin poco mas o menos US$1.5 bilyon o ₱84 bilyon hale sa manlain lain na mga business group asin investor.
Obheto kan nasabing pledges na magbilog nin 1,250 megawatts (MW) na kantidad kan renewable energy capacity sa enterong probinsya.
Anom na investors man an nagpromesa na masuporta sa probinsya sa paggamit nin renewable energy asin sa mga proyekto na partikulamente sa solar asin wind power.
Kasabay sa mga naunambitang pledges an 200MW na solar farm sa banwaan kan Pio Duran asin 20MW man nin solar project na itutugdok sa may parte kan San Miguel mantang mabugtak man nin 100MW sa parte kan Albay Gulf para man sa wind energy.
Magigirumduman na nagdeklara nin state of climate emergency si Albay Governor Grex Lagman kan nakalihis na taon asin nangapudan sa mga komunidad asin kapwa kaini nahalal na mga opisyal na suportaran an saindang pangapudan asin tugunan an nangyayaring pandaigdigang krisis sa klima.
