LEGAZPI CITY – Naobserbaran kan mga kapulisan sa Provincia kan Albay an pagbaba sa numero kan mga turista katakod kan pag-obserbar kan Semana Santa.
Segun ki Albay Police Provincial Office Provincial Director Police Colonel Noel Nuñez sa intrevista kan Bombo Radyo Legazpi na pwedesir na huli ini sa krisis sa produktong petrolyo kun kaya kadaklan sa mga kakalsadahan an puro mga motor sana an nag-aagi.
Pagdoon niya man na magpapadagos pa man liwat an saindang deployment sa ibong kan terminated na an Oplan Semana Santa huli sa pag-implementar kan saindang Oplan Ligtas SumVac ngonian na taon na matapos sagkod sa Hunyo.
Paglilinaw niya man na afuera sa Oplan Ligtas SumVac an nagtetenir an saindang red alert status huli man sa padagos na pag-aalburuto kan Bulkang Mayon.
Pigheras man kan opisyal an impormasyon mapadapit sa sarong nagtetenir na naka-confine sa hospital makalihis ma-irido kan duminausdos na police mobile sa Ligao City kun sain matrayumpong nakapagsa-irarom na ini sa surgery.
Nauugma man siya huli ta dakol an naka-apresyar sa saindang mga personahes sa pagpapa-otob nin pazy orden urog na kan nakalihis na Semana Santa.
Pangapodan ni Nuñez sa publiko na kun mahali sa saindang kaharongan, syertuhon na salbado ninda ining babayaan nganing malikayan an kasulo o mabiktima kan parahabon siring man na enuton an saindang seguridad sa saindang pagbabakasyon.
