LEGAZPI CITY- Inasegurar kan Albay Police Provincial Office an saindang kahandaan pag-abot sa pagtataong seguridad sa mga delegado asin partisipantes kan Private Schools Athletic Association 2024.
Segun ki Community Affairs and Development Unit Assistant Chief Police Major Genevieve Oserin sa intrevista kan Bombo Radyo Legazpi na nakapag deploy na nin nasa 1, 015 na mga kapulisan para pagbabantay kan paz y orden.
Napag-araman na magin sa mga billeting areas an nakapaglatag na man nin mga police assistance desk ngani na magtaong asistensya sa mga delegado.
Sinabi kan opisyal na mawot nindang masierto na warang anuman na dae pinaglalaoman na insidente sa bilog na durasyon kan aktibidad.
Mientras tanto, afuera sa nasabing sporting event naghahanda man an mga kapulisan sa Albay sa paglalatag nin seguridad kasabay kan State of the Nation Address ni Presidente Ferdinand Marcos Jr.
Sinabi ni Oserin na may mga lakdang na ilalatag an kapulisan katakod kan piglalaoman na mga hiro protesta kan mga progresibong grupo.
Nilinaw kan opisyal na libredong makapagpahayag nin opinyon an mga progresibong grupo alagad hinagad kaini na warang makulugan asin magin matrangkilo man liwat sa tahaw kan mga hiro-protesta.
