LEGAZPI CITY-Kinumpirma kan transport group na Piston Bicol na masabay sinda sa nakatalaang 2-days nationwide transport strike sa Setyembre 29-30 bilang parte kan pangapudan kan sektor kan transportasyon sa padagos na paglangkaw kan produktong petrolyo.
Segun ki Condor-Piston Bicol President Ramon Rescovilla, sa eksklusibong intrevista kan Bombo Radyo Legazpi, na ikokundusir ini poon alas 6:00 nin pagkaaga hasta alas 6:00 nin banggi sa maabot na Martes asin Miyerkules, Setyembre 29-30.
Nilinaw man ni Rescovilla, na nagpaabot na sinda nin Letter of Information (LOI) sa ibang mga distrito alagad pigsisikap pang ipaabot ini sa iba, orog na sa iba pang mga eskwelahan.
Matugdok man sinda nin mass action center sa parte kan Bañadero, Daraga, asin sa may Bascaran, Anislag, sa Peñaranda Park, igwa man sa Marcial O. Rañola Memorial School (Morms) sa Guinobatan asin sa Ligao.
Ini ngani siertuhon na ipangapudan an padagos na paglangkaw kan fuel price asin an patsi-patsing solusyon kan gobierno, ngani magkaigwa nin industriyalisasyon asin papabaon an presyo.
Nasasabutan man suboot ninda an katiosan kan iba asin dai maiibitaran na magkaigwa nin pagsasawata, alagad naghahagad man sinda nin dispensa orog na sa mga komyuters na maapektaran kan welga.
Padagos man suboot nindang pigsisierto na an saindang welga, sarong matoninong na paagi huli ta direhos ninda ini asin tulos sindang nag-aabisu ngani gabos makapag-preparar.
Nagpagirumdom man an opisyal na bako sana suboot ini laban kan sektor kan transportasyon, kundi laban man kan mga kababayan, orog na ngani ipangapudan man an paglangkaw kan sahod kan mga obrero.
