LEGAZPI CITY- All set na an mga kapulisan sa provincia kan Albay para sa paglalatag nin seguridad sa enot na aldaw kan mga aktibidad para sa Bicol Loco festival.
Segun ki Albay Police Provincial Office Director Police Colonel Julius Añonuevo sa intrevista kan Bombo Radyo Legazpi na pigkakarkulong nasa 700 na mga kapulisan hali sa saindang opisina an ipapalakop.
Partikular mente na tututukan kaini an banwaan kan Daraga asin ciudad kan Legazpi.
Marurumduman na pinag-aantisiparan kaya an pagruso kan mga maatendir sa mga aktibidad, kaibanan na an mga turista na mapasiring sa provincia.
Segun sa opisyal na nakaolay na man niya an mga organizers asin natukar an pagtutok sa nagkapirang mga aspeto na nagkaigwa nin kakulangan sa enot na pagkokundusir kan aktibidad kan nakalihis na taon.
Ini an ngani na mas magin matrangkilo an dalagan kan bilog na durasyon kan aktibidad na pinaglalaoman na magigin dakulang tabang para sa turismo sa provincia.
