LEGAZPI CITY- Emosyunal na nangapudan nin tabang an agom kan sarong Pinoy seamen na hasta sa ngonyan an nawawara pa makalihis na lumubog an piglulunadang cargo vessel sa Japan.
Sa intrevista kan Bombo Radyo Legazpi ki Cielo Marie Fernandez, nag-apod pa an agom kaini na seafarer antes na maglaog sa trabaho asin dae pighuna na hudyan na palan ninda ining pag-oolay.
Padagos na naglalaom si Fernandez na buhay pa an agom huli ta nakaasign ini sa life saving equipment kaya sierto suboot na aram kaini an gigibuhon.
Hagad man kaini sa mga otoridad na makaolay an enot na Pinoy na narescue huli ta harani ining amigo kan saiyang agom.
Napag-araman na na-wash-out an barko huli sa kusog kan ukol na dara kan pig-aandamang bagyo na matama sa Japan.
Pangapudan man kaini sa mga otoridad na maparikas pa an rescue operation sa mga nawawara pang persona.
