Sinierto ni National Food Authority (NFA) Administrator Larry Lacson na igwang bastanteng pondo an ahensya para sa ipiglangkaw na presyo kan pagbakal nin paroy sa mga lokal na paraoma na ngonian P30 kada kilo para sa malinig asin mara, mantang igwang suway man na presyo para sa dumog na paroy.
Segun ki Lacson, uminabot sa P9 bilyon an inilaan na pondo sa irarom kan General Appropriations Act, kaiba an dagdag na P10 bilyon na pondo hale sa Department of Agriculture tanganing suportaran an lakdang na ini.
Aniya P27 sana an enot na target na presyo, alagad huli ta hababa an nagpapabakal sa naunambitang presyo, kinakaipuhan langkawan ini tanganing mas magin kapaki-pakinabang asin kaakit-akit sa mga paraoma.
Ipinaliwanag ni Lacson na an pangenot na nagbusol sa ahensya para sa pagbabagong ini iyo an mabawasan an pagtios kan mga paraoma sa pagtanom huli sa padagos na paglangkaw kan presyo kan fertilizer asin gasolina, tanganing masiguro na makakabawi an mga prodyuser sa saindang mga gastuson.
Mantang naipatupad na an paglangkaw, inamin ni Lacson na dai pa ninda matantiya an eksaktong kantidad nin paroy na maibubuhos asin maipagpapabakal kan mga paraoma, alagad target ninda na umabot sa 500,000 metric tons an makolekta tanganing masiguro an sapat na volume para sa pambansang procurement asin mabilog an kinakaipuhang buffer stock kan nacion sa paagi nin pag-enganyo sa mga paraoma na darahon an saindang ani sa mga pinagpreparar na bodega.
