Nanuga an House Committee on Agriculture and Food na babantayan an mga nabunyag na maling coordinate sa mga farm-to-market-roads (FMR) na nakapalaog sa propuestong 2027 national budget.
Kabale digdi an imbestigasyon kan Department of Agriculture (DA) sa mga nasambitang proyekto tanganing aramon an katotoohan sa likod kan mga ini.
Segun ki committee chair asin Quezon City Rep. Mark Enverga, muya kan Kongreso na masierto na mapanagot an mga responsable sa mga nasambitang propuesto, masuri an hewas kan pagkakamali, asin masigurong dae na mauulit an kaparehong isyu.
Segun sa mambabatas, ‘welcome’ para sa Agri and Food Committee an panuga ni DA Sec. Francisco Laurel Jr. na susuriin an gabos na mga nakapalaog sa nasambitang isyu asin aramon an mga yaon likod kaini.
Kaiba kan DA sa imbestigasyon an nagkapirang budget watchdog, pira sa mga ini an mismong nagbunyag sa pagkakamali sa coordinate.
Naenot nang inako kan DA na walo sa 1,669 na farm-to-market road projects sa National Expenditure Program (NEP) an igwang maling coordinates huli sa encoding errors o maling pagkaka-type nin saro o duwang numero.
