Ipinarerekonsidera kan election lawyer asin petisyuner na si Atty. Romulo Macalintal sa Korte Suprema an nakaaging desisyon manungod sa Barangay asin Sangguniang Kabataan Elections 2026.
Liwat na dumulog sa Kataas-taasang Hukuman an abogado sa paagi kan saiyang isinangat na ‘Motion for Partial Reconsideration’.
Mawot ni Atty. Macalintal na madagos pa man giraray an naunambitang eleksyon sa mga barangay sa ibong kan naging desisyon kan hukuman, kaya nagmungkahi siya nin ‘win-win solution’ na segun saiya pabor para sa magkaibong na panig.
Ipinadedeklara niyang ‘constitutional’ an kapangyarihan kan kongreso na i-extend an termino kan mga barangay asin SK officials, mantang an pagkakaudlot kan eleksyon ipigdoon na dapat ituring na ‘unconstitutional’.
Poon sa nakatalaan kuta na eleksyon ngunyan na Nobyembre 2026, nailipat ini sa taon 2028 makalihis pagtibayon kan korte an Republic Act No. 12326, kaya mawot niya na atasan an Commission on Elections na isagibo sa pinakapraktikal asin pinakamarikas na panahon an BSKE, kaiba an kahagadan na magkaigwa nin ‘oral arguments’ sa pagresolba kan hukuman sa saiyang mosyon.
