LEGAZPI CITY – Pinapaboran kan Schools Division Office (SDO) Albay an Executive Order No. 130 ni President Ferdinand Marcos Jr. na nagtatao nin poder sa mga school heads na magdesisyon kun may suspension nin klase o on-site work sa mga pampubliko asin pribadong eskwelahan.
Segun ki SDO Albay Spokesperson Froilan Tena, sa intrevista kan Bombo Radyo Legazpi, mas magigin madali an pagdeklara nin suspension asin maiibitaran an halawig na pagkaudlot kan klase, lalo na kun an sitwasyon iba-iba kada lugar.
Klaro sa EO na an school head an makakadesisyon kun face-to-face o on-site learning an gigibuhon, lalo na kun may impediment arog kan heat index o iba pang peligro, asin pwede man niyang i-lift an suspension basta igwang pagtugot kan local chief executive.
Alagad, dai pa ini tulos na maipapatupad sa Albay huli ta kaipuhan pang magkaigwa nin klaradong localized policy na nakaayon sa EO asin sa mga existing na executive order kan probinsya asin LGU.
Huli digdi, nagtao an SDO Albay nin 30 aldaw tanganing ma-establisar an lokal na polisiya sa paagi nin inter-agency coordination kaiba an LGU, mantang nagpadagos na an klase makalihis an suspension kawsa kan aktibidad kan Bulkang Mayon.
