LEGAZPI CITY– Uminabot na sa poco mas o menos 45,000 pasahero an nairehistro kan Coast Guard District Bicol poon Oktubre 29 hasta ngonian na Undas.
Segun kay Spokesperson Lieutenant (junior grade) Allysa Novie Bermal kan CGD Bicol, sa intrevista kan Bombo Radyo Legazpi, nasa 25,873 an outbound passengers asin 19,945 an inbound passengers na nairehistro sa mga pantalan sa rehiyon.
Mas dakol suboot an outbound passengers, huli ta an Bicol an exit gateway pasiring sa Visayas hale sa Southern Luzon.
Pigsierto ni Bermal na warang nairehistrong mayor na dae piglalaomang insidente sa gabos na pigbabantayan na pantalan, huli sa padagos na pagpapatupad nin security protocols asin safety measures.
Nasa 563 tawohan kan PCG an naka-deploy sa bilog na Bicol Region, na dinagdagan pa nin 589 hale sa Deployable Response Group, kabale an mga nakabantay sa beach areas asin tourist destinations kun sain inaandam an pagdagsa kan tao makalihis an Undas.
Piga-andam man na liwat madakol an mga pasahero ngonian na aldaw hasta sa aga, pabalik nin Maynila asin iba pang lugar, makalihis an halabang bakasyon.
Pagirumdom kan PCG sa publiko na magdanog sa anunsyo kan mga otoridad asin isierto na lehitimo asin awtorisado an pandagat na lunadan.
