Nangapudan si Senate President Win Gatchalian sa mga lokal na gobyerno asin ahensya na nagpapaotob kan ley na pakusugon an mga lakdang sa seguridad tanganing maseguro an kaligtasan kan mga biyahero sa halawig na weekend na ini para sa pag-obserbar kan Undas.
Segun ki Gatchalian, piglalaoman an pagdakol kan mga pasahero sa mga expressway, mayor na tinampo, bus terminal, airport, asin seaport mantang an mga Pilipino nag-uuli tanganing bisitahon asin girumdomon an saindang mga nagadan na mahal sa buhay.
Huli kaini, nangapudan siya sa mga lokal na gobyerno asin otoridad na pakusugon an implementasyon kan mga security protocols ngani na maibitaran an mga untoward incidents asin maseguro an marahay na byahe kan publiko.
Sinabi niya na an akto nin paggirumdom sa mga nagadan na namomotan nagigin mas makahulugan kun an pagbiyahe kan gabos marahay asin ligtas.
Tinawan man nin duon kan Senate President an importansya kan disiplina, pasensya, asin respeto sa mga kapwa motorista, orog na sa mga panahon na piglalaoman an mas magabat na trapiko.
Nag-abiso pa ini sa mga motorista na magbibiyahe sa Undas na kontrolon an saindang init nin payo asin magin marespeto sa ibang mga drayber.
