LEGAZPI CITY- Nagsagibo nin evacuation an LGU Camalig makalihis magtuga nin abo an Bulkan Mayon sa langkaw na 3 kilometros kasubagong alas 11:53 nin udto ngonian na aldaw, Oktubre 30.
Segun ki Alkalde Caloy Baldo, igwang ashfall na naranasan sa Camalig, alagad bako pa man ini makusog.
Target kan pag-ebakwar an 205 residentes na yaon laog kan 6-kilometer danger zone na iyo an parehong mga indibidwal na nag-ebakwar kan nakaaging pagtuga.
An pag-ebakwar nagpoon kan ala 1:00 nin hapon kun sain an Purok 4, 5, 6, asin 7 kan Anoling dinara sa Tagaytay Elementary School, mantang an mga hale sa Purok 7 kan Sua, kaiba an mga porsyon kan Purok 6 asin 7 kan Quirangay, dinara sa Camalig Bungkaras Evacuation Center.
Maserbi man na evacuation centers an Bariw asin Bongabong asin an kada barangay igwa nin naka-standby na rescue vehicle.
Inabisuhan an mga evacuees na darahon an mga sleeping gear asin mga balde na dati nang itinao sa sainda, mantang padagos an preparasyon para sa pagdistribwer kan food packs.
Suspendido man an klase sa gabos na lebel sa bilog na probinsya nin Albay ngonian na aldaw, mantang naghahalat nin dugang na mga advisories.
Mahigot na ipinagbabawal an paglaog sa 6-kilometer danger zone.
Nangapudan man si Alkalde sa mga residente na magsunod sa ipinapautob na evacuation order asin magdanay sa mga ligtas na lugar.
