Nagsagibo an Department of Environment and Natural Resources (DENR) nin ecosystem restoration program sa bilog na nacion na nakasentro sa rehabilitasyon kan mga salog, estero, asin iba pang agihan nin tubig komo pag-andam sa banta nin Super El Niño sa nacion.
Segun sa ahensya, katuyuhan kaini na maseguro na an mga salog asin manlaen-laen na wetlands kan nacion magdadanay na functional asin an tubig padagos na nagbobolos nin maray.
An inisyatiba na ini nagseserbi man na proteksyon sa mga komunidad na nakapalibot sa mga katubigan na ini.
Nagsagibo an Manila Bay Site Coordinating and Management Office kan DENR nin mga aktibidad sa paglinig kan salog asin pagmantenir kan agihan nin tubig komo parte kan Manila Bay Rehabilitation Initiative.
Ipinadara man an mga River Rangers sa Pampanga tanganing magsagibo nin 10-aldaw na operasyon nin paglinig sa mga salog asin estero.
Uminabot na sa total na 98,618.93 kilogram nin basura na katumbas nin 15,267 sako an nakolekta sa mga lininig na estero, salog, asin creek.
Mientrastanto, padagos an pagmonitor kan DENR’s Manila Bay Site Coordinating and Management Office sa mga pinagkukuanan nin supply nin tubig sa Bulacan, Pampanga, Nueva Ecija, Bataan, asin Tarlac.
Padagos man an DENR Region 3 na nagmomonitor kan potensyal na marine heat stress sa mga baybayon kan Aurora, Bataan, asin Zambales tanganing ma-assess an kondisyon kan mga apektadong marine ecosystems asin tanganing matabangan an mga pangisdaan sa pag-atubang sa halangkaw na temperatura kan dagat
