LEGAZPI CITY-Magkokondusir nin ‘holistic approach’ an Bureau of Fire Protection (BFP) Masbate para sa posibleng matinding epekto kan Super El Niño sa provincia.
Segun ki BFP Masbate Public Information Officer Fire Officer 1 Reden Invento, sa intrevista kan Bombo Radyo Legazpi na mas papahigoton ninda an prevention campaign tuyong tag-init huli ta igwang tendensiya na mas halangkaw an insidente nin kasulo sa panahon na ini.
Huli ta mas kadakol an naggagamit nin kuryente asin masyadong ‘dry’ an palibot, kun kaya madaling magkaigwa nin kasulo.
Magsasagibo man sinda nin fire risk assessment kun sain aaramon an mga lugar na igwang water resources, siring man an mga lugar na warang water resources, ngani makapagtagama nin personnel asin fire trucks.
Preparado man an saindang mga ekipahe, siring kan mga fire trucks asin nagsasagibo na sinda nin koordinasyon sa mga LGUs para sa posibleng augmentation.
Mas hihigotan man ninda an mga training asin drills, huli sa posibleng paglangkaw kan kaso kan kasulo sa lugar.
Mas heightened an saindang fire monitoring tuyong tag-init, orog na sa mga grasslands, kun sain posibleng magkaigwa nin grassfires, forest fires, asin agricultural fires.
Huli man ta limitado an suplay nin tubig, posibleng mas diit an suplay sa saindang provincia, alagad mas pinaghahandaan ninda ini.
Padagos man an saindang pag-edukar sa mga residente manungod sa paglikay sa anumang fire incidents asin pagbawas sa paggamit nin kuryente, na pirmihang kawsa kan kasulo.
