LEGAZPI CITY-Sinibak sa puwesto an tulong opisyal kan Department of Public Works and Highways (DPWH) sa Davao City na pinag-iimbestigaran katakod kan suboot mga iregularidad sa mga flood control project sa ciudad.
Kinumpirma ni DPWH Secretary Vince Dizon an lakdang ngonian na Lunes, Oktubre 19, kasunod kan imbestigasyon kan National Bureau of Investigation (NBI) sa mga kuwestiyonableng proyekto.
Kabale sa mga sinibak si dating Davao City District Engineer Richard Ragasa, na saro sa mga respondent sa mga reklamong isinangat kan NBI sa Department of Justice (DOJ).
Susog sa mga naenot na report, pig-iimbestigaran kan NBI an mga flood control project na iginawad sa Genesis88 Construction Inc. makalihis na mahilingan nin posibleng iregularidad sa mga dokumento asin pagpapaotob kan nagkapirang proyekto.
Kan Oktubre 13 asin 14, nagsangat an NBI nin mga reklamong kriminal laban sa 21 indibidwal, kaiba an mga opisyal asin tawohan kan DPWH Davao District Engineering Office asin mga kinatawan kan mga pribadong construction firm.
Kaiba sa mga posibleng pagbayolar na inirekomenda kan NBI angfalsification of documents asin pagbayolar sa Anti-Graft and Corrupt Practices Act.
Siring man an mga reklamo na nagsasairarom sa pagbusisi kan DOJ ngani maaraman kun igwang bastanteng batayan para sa pagsasangat nin kaso sa korte.
