LEGAZPI CITY-Hayagang pig-kwestyun kan CaSSiPi publication kan Bicol University an suboot dai paghanay sa human advocacy kan unibersidad sa nacion na Israel mantang presenteng nagsasagibo suboot ini nin “genocide” sa Gaza.
Segun kay CaSSiPi publication Managing Editor Gid Ohmer Galvez, sa eksklusibong intrevista kan Bombo Radyo Legazpi na mantang nakapokus an unibersidad sa direchos humanos, pigkwestyun ninda an pagpopoon kan diplomatic relationship kaini sa Israel.
Ini makalihis an nagin courtesy visit ni Her Excellency Dana Kursh, an Ambassador of the State kan Israel sa unibersidad.
Pigkwestyun man ninda kun kasuarin nagpoon an diplomatic relation kan unibersidad asin kan Israel.
Kasunod kaini, tinawan doon ni Galvez na dae dapat isikwal an isyu sa Gaza huli ta kadakol an apektado an pamumuhay kun sain hasta sa presente, warang maayos na kamugtakan an mga Palestino.
Sinabi pa niya na mahihiling sa mga ebidensya na masasabing “genocide” an pigsasagibo kan Israel sa Gaza.
Dugang pa niya, digdi suboot makukwestyun kun ano an moral na obligasyon asin “dillema” sa pagsasagibo nin courtesy visit para sa pagpapahigot kan relasyon asin pag-welcome sa nacion.
Pwedisir suboot na makua an nasabing koneksyon sa nacion alagad dapat timbangon man kun ano an mas kinakaipuhan asin kun ano an mas importante sa presente.
Dapat suboot na nakahanay an aksyon asin pagigin humanity advocate kan unibersidad manungod digdi.
Bilang saro sa mga kabataan, sinabi pa kaini na dae dapat isikwal an isyu o magin ignorante sa mga bagay-bagay.
Bilang saro man sa mga boses kan nacion asin paglaom kan banwaan, dapat suboot na aramon muna an pinagpoonan kaini bago magsagibo nin mga komento.
Mientras tanto, wara pang simbag an nabanggit na institusyon manungod sa nasabing isyu.
Magigirumdumang inuran nin batikos hale sa mga estudyante asin netizens an nasabing diplomatikong pagbisita kan Israel sa unibersidad.
