LEGAZPI CITY- Nangapodan nin paninimbagan an Federation of Free Farmers sa mga responsable sa duwang kargamento nin bagas hali Vietnam na nasabat kan Bureau of Customs sa mga pantalan kan Davao asin Limay, Bataan.
Sa intrevista ki Federation of Free Farmers Chairman Leonardo Montemayor, sa intrevista kan Bombo Radyo Legazpi, sinabi kaini na an total na kargamento kan duwang barko uminabot sa poco mos o menos 20,000 metriko tonelada, na may pigkakarkulong kantidad na P700 million.
An enot na shipment, na may 12,500 metriko toneladang bagas, lunad kan M/V Tay Son 2 asin nakadestinir para sa Planters Products Incorporated o PPI.
Sinabi pa ni Montemayor na nasabat ini sa Port of Davao huli sa problema sa kinakaipuhan na dokumento para sa pag-import kan bigas, kabale na an sanitary and phytosanitary import clearance.
An ikaduwang kargamento, na may 7,500 metriko tonelada nin bagas, lunad kan M/V Lucky Star asin pasiring sa Crystal San Pedro Rice Mill, na igwa man nin problema sa validity kan permit para sa pag-import kan mga kargamento.
Sa kaso kan M/V Tay Son 2, igwa suboot nin pagprobar na makadulag sa barko mantang yaon sa pantalan kan Davao, kaya pigbukod ini kan Philippine Navy antes pa ini makaabot sa General Santos.
Sa huri, ineskortan ini kan Philippine Coast Guard pabalik sa Davao.
Nanindugan si Montemayor na dapat panimbagon an mga mapapatunayang responsable sa iligal na importasyon, urog na posibleng sakop kan Anti-Agricultural Economic Sabotage Act an mga siring na kaso kun maotob an mga rekisitos kan ley.
Sa ibong na lado, nanindugan an PPI na ini sarong pribadong kumpanya na rehistrado sa Securities and Exchange Commission, mantang sinabi ni Montemayor na igwang mga records na nagpapahiling na saro ining pagsasadiri asin kontrolado kan gobyerno.
Alagad para sa grupo, pribado man o gobyerno an kompanya, an mas importanteng isyu iyo an soboot kawaran nin balidong permit pag-abot kan mga kargamento.
Sa huring pangapodan, inengganyar ni Montemayor an mga paraoma asin an publiko na magin mapagmatayag sa mga pagprobar na ipalusot an mga produktong agrikultural asin isumbong sa mga awtoridad./ via Bombo Benj Gravito
