LEGAZPI CITY-Nagpagirumdom an Department of Health (DOH) sa publiko na likayan an pagkarigos o pag-karaw sa tubig baha huli sa huma nin nakakagadan na leptospirosis, kasunod kan lakop na pagbaha sa Metro Manila asin iba pang rehiyon sa kahalabaan kan Habagat.
Segun sa DOH, delikado an tubig baha huli ta kontaminado ini kan ihi kan mga hayop na may helang na nagigin kawsa nin impeksyon asin iba pang helang na dara kaini.
Dapat mangnohon na naglangkaw giraray an kaso nin leptospirosis sa nacion makalihis an magkasunod na pag-uran asin matinding pagbaha kan mga nakalihis na semana.
Nganing masimbagan an sitwasyon, pigsierto kan ahensya an tamang hospital referral system, magkakanigong suplay nin mga bulong, asin tulos na atensyong medikal para sa mga pasyente.
Kabale man sa tulos na lakdang kan DOH an pagdeploy nin dagdag na nurses, siring man an paggibo nin tent asin dagdag na cot bed sa mga ospital.
Sa presente, pig-activate na man an Leptospirosis Express Lanes sa 33 DOH hospitals sa Metro Manila, Regions I, II, III, asin Cordillera Administrative Region (CAR) para sa mas marikas na pagresponde sa mga may sintomas.
