LEGAZPI CITY-Naninindugan an Presidente kan Taiwan na si Lai Ching-te na dai ninda itatao maski sarong pulgada o sarong kabtang kan saindang teritoryo.
Nangangahulugan ini na idedepensa kan Taiwan an lambang parte kan saindang kadagaan, kaiba an mga saradit na isla arog kan Kinmen, Matsu, asin Penghu.
An Presidente kan Taiwan, ipinahayag ini sa saiyang pagbisita sa frontline island kan Kinmen kun saen nagtao siya nin diskurso sa mga beterano sa gera ngani girumdomon an ika-68 anibersaryo kan 1958 Artillery Battle kan Agosto 23.
Pigduon man kan Presidente Lai na makakamtan sana an katoninongan sa paagi nin kusog. Nagtutubod si Presidente Lai na dai makakamtan an katoninongan sa paagi sana nin paghagad o paglaom na dai maatake an China. Dapat suboot makusog an militar kan Taiwan nganing matakot an ibang nacion na sakyadahon ini.
Sinabi niya na sa ibong kan maraot nas panahon, nagduman siya sa Kinmen nganing ipahayag, sa ngaran kan bilog na nacion an saiyang udok sa boot na paggalang asin pasasalamat sa mga bayani, na nagkasararo nganing isikwal an agresyon kan totalitaryang komunista asin protehiran an saindang lupain.
Sinabi man kaini na sa laog nin 68 taon, dae nagpundo kan ambisyon an China na pahiwason an saindang teritoryo. Sinabi niya na ini an nagdadara nin kariribokan sa bilog na rehiyon kan Indo-Pacific, kaya an kapangganahan kan Taiwan kan panahon na ito nakaulang sa ambisyon kan China na sakupon an inaapod na “first island chain.”
Nagpahayag man si Lai kan saiyang suporta sa plano na dagdagan an budget sa depensa kan Taiwan.
Bilang konteksto kan pangyayari kan Agosto 23, 1958, binomba kan China an isla nin Kinmen. Ini an kapinunan kan “Ikaduwang Krisis sa Taiwan Strait”. An Taiwan nakipaglaban sa tabang kan Amerika sagkod na matapos an iriwal na warang malinaw na nanggana digdi.
Kritikal an lokasyon kan Kinmen huli ta an isla haraning marhay sa China, wara pang duwang kilometro an distansya sa baybayon kan China, ini an nagpapa-sensitibo sa lugar pag-abot sa depensa kan Taiwan.
