Nakatalaang magbalik sa New York ang Filipina tennis sensation na si Alexandra “Alex” Eala para sa saiyang ikaduwang pagsabak sa main draw kan prestihiyosong US Open.
Presenteng nasa ika-20 puwesto sa world rankings ang 21-anyos na atleta, bagay na nagbubugtak saiya sa magayon na posisyon nganing magin seeded player sa women’s singles division kan nasabing Grand Slam tournament.
Magigiromdomang naggibo nin kasaysayan si Eala sa parehong torneo kan nakalihis na taon makalihis magin kaenot-enoting Pilipino na nanggana nin laban sa Grand Slam main draw sa paagi kan pagkagana kontra ki Clara Tauson sa opening round.
Afuera sa saiyang trayumpo sa professional circuit, naging makasaysayan man an New York para saiya kan 2022 kan magkampeon siya sa girls’ singles event makalihis daugon si Lucie Havlickova sa finals.
Malaog si Eala sa kompetisyon bitbit an magayon na momentum hale sa saiyang North American swing, kabale an pagkagana kan saiyang kaenot-enoting WTA title sa Mubadala DC Open siring man an matrayumoi na kampanya sa Canada at Cincinnati.
Afuera sa singles event, malaban man an Pinay tennis star sa mixed doubles tournament kung sane makakapareha niya ang world number four na si Felix Auger-Aliassime.
