LEGAZPI CITY—-Takdag sa kamot kan mga otoridad an Number 8 drug personality sa rehiyon kan Bicol sa kinundusir na buy-bust operation sa Purok 1, Barangay Tula-Tula Grande, Ligao City.
Naarestar si alyas “Padi” makalihis makumpiskar digdi an nasa 10 gramos nin pigtutubudang shabu na may estimated standard value na P68,000, buy-bust money, mobile phone, asin nagkapirang kwarta na ginamit sa operasyon na pigtutubudang konektado sa mga aktibidad sa ilegal na droga.
Ginibo an operasyon kan operatiba kan Philippine Drug Enforcement Agency Regional Office 5, PDEA Albay Provincial Office asin Ligao City Police Station.
Mahahampang an suspek sa kasong pagbalgar sa Section 5, Article II kan Republic Act No. 9165 o an Comprehensive Dangerous Drugs Act of 2002.
Segun sa ahensya, magpapadagos an saindang mahigot na intelligence-driven anti-drug operations nganing maarestar an high-value drug personalities asin masakyada an illegal drug networks sa rehiyon, mantang pig-engganyar man ninda an publiko na magtinir na mapagmatyag asin padagos na suportaran an kampanya kan gobierno kontra sa mga ilegal na droga.
