Maabot sa 16-member na legal team an marepresentar ki Vice President Sara Duterte sa saiyang impeachment trial ngunyan na Lunes, Hulyo 6.
Napag-araman na anas mga pribadong abogado an nagbibilog sa depensa kan bise presidente, bako siring kan prosecution panel na kumpwesto nin mga lehislador asin private prosecutors.
Kadaklan sa mga abogado an konektado sa Fortun, Narvasa & Salazar Law Office.
Pugpapangenotan an legal team ni Atty. Sheila Sison, na igwang 12 taon na eksperyensya sa propesyon.
Kaibanan bilang tagapagtaram kan depensa si Atty. Michael Poa, dating opisyal kan Department of Education asin Office of the Vice President.
Kaibanan pa sinda Atty. Gregorio Narvasa II asin Atty. Philip Sigfrid Fortun na igwang labi sa 40 taon na eksperyensya sa ley asin pigkokunsiderar na pinaka-beterano sa saindang grupo.
Si Narvasa an aki ni dating Chief Justice Andres Narvasa na nagin abogado man kaito ni dating Presidente Joseph Estrada sa saiyang impeachment trial kan 2001.
Si Fortun man an bisto sa pagkapot kan nagkapirang high-profile cases, kaibanan an Kuratong Baleleng case ni Senator Ping Lacson asin graft case ni Senator JV Ejercito.
An iba pang miyembro kan defense team an kumpwesto nin mga joven na abogado na mas hibaba sa sampulong taon an eksperyensya sa pag-aabogasya.
