LEGAZPI CITY-Ikinasa kan Gatchalian bloc an posibilidad na magsangat nin kaso laban sa mga indibidwal na nag-atendir sa Senate Blue Ribbon Committee hearing na pinangenotan kan Cayetano bloc, huli sa suboot sa kawaran nin parliamentary immunity.
Segun ki Senador Panfilo “Ping” Lacson, posibleng sangatan nin cyber libel asin iba pang kaso an mga nagpartisipar sa hearing huli ta pigkokonsidera ining “bogus” asin invalid kan presenteng liderato.
Sinabi ni Lacson na dae pwedisir na gamiton bilang depensa an parliamentary immunity huli ta bako man opisyal an ginibong hearing kan Huwebes, Hunyo 11.
Sinegundahan naman ini ni Senator Francis “Kiko” Pangilinan, na nagsabing warang bisa an immunity kan mga nag-atendir huli ta bako man ini sarong pormal asin opisyal na proceedings kan Senado.
Parehong kaiba sina Lacson asin Pangilinan sa Gatchalian bloc na nagdeklara na bakante an gabos na posisyon sa Senado huli sa tulong aldaw na pagliban kan Majority senators sa plenary sessions kan Mataas na Kapulungan.
Enot nang sinabi ni Senador Alan Peter Cayetano na siya pa man giraray an lehitimong Senate President asin igwa nin direchos na magkondusir kan Blue Ribbon hearing na pinangenotan nina Senador Pia Cayetano asin Rodante Marcoleta.
