LEGAZPI CITY-Pigkwestyon ni Senador Panfilo “Ping” Lacson an P1.9-trilyon na pondo kan gobierno para sa mga flood control projects makalihis na makaeksperyensiya giraray nin mahiwas na pagbaha an mga parte kan nacion huli sa warang patod na pag-uran dara kan Habagat.
Segun ki Lacson, naggastos nin P1.939 trilyon an Department of Public Works and Highways (DPWH) para sa flood control management program poon 2011 hasta 2025.
Alagad, sa ibong kan dakulang pondo na itinagama, dakul pa suboot na naeeksperyensyahan an pagbaha sa dakul na lugar, kabale na an Metro Manila.
Sa sarong post sa X (dating Twitter), sinabi ni Lacson na labi sa P1 trilyon an nagastos sa flood management kan nakaaging 15 taon.
Katumbas ini nin haros P350 milyon kada aldaw.
An taunan na pondo, iyo an pinakadakula kan 2025, na nag-abot sa P372.8 bilyones.
Sinundan ini kan P346.7 bilyon kan 2024 asin P287 bilyon kan 2023.
Segun ki Lacson, dapat na ma-assess kun nagin epektibo an mga flood control projects kan DPWH, orog na padagos na nakakaeksperyensya nin pagbaha an manlaen-laen na lugar.
Si Lacson dati nang naggibo nin mga alegasyon madapit sa suboot anomalya sa mga proyekto sa nagkapirang flood control projects sa Bulacan asin Oriental Mindoro.
Nagsumiter man suboot ini nin ebidensya sa Office of the Ombudsman madapit sa nagkapirang ‘anomalous slope protection projects’ asin ‘illegal reclamation activities’ sa Taguig City.
