LEGAZPI CITY- Sinigurado kan Department of Trade and Industry (DTI) na warang nakatalaan na paglangkaw kan presyo kan mga basic goods asin prime commodities, kaiba an bottled water, sa ibong kan posibleng epekto kan Super El Niño sa nacion.
Segun ki DTI Secretary Maria Christina Roque, wara pa sindang nareresibe na kahagadan hale sa mga manufacturers para sa paglangkaw kan presyo kan mga basic products.
Pigsierto man kan kalihim na igwa nin magkakanigong supply nin mga barakalon sa merkado.
Padagos man na nagmomonitor asin nakikipag-olay an ahensya sa mga manufacturer tanganing mamantenir an estabilidad kan presyo sa merkado.
Nangapudan man si Roque sa publiko na likayan an panic buying ngani na maibitaran an posibleng kakulangan nin supply.
Mientrastanto, katakod kan nagdadangadang na holiday season, sinabi kan DTI na warang nairehistrong paglihis sa presyo kan mga festive products ngonian na aldaw mantang nakatutok pa man giraray an ahensya sa pagmonitor kan presyo kan mga basic goods.
