LEGAZPI CITY-Nadawit kan nagpabistong 18 dating miembros kan marines si Presidential son asin Ilocos Norte Representative Sandro Marcos na imbuelto suboot sa pagresibe nin mga maleta nin kwarta sa imbestigasyon kan Cayetano bloc, sa mga maanomalyang flood control projects.
Durante kan pagdangog kan Huwebes, Hunyo 4, sinabi ni Belnard Tube, saro sa mga nagpamidbid na dating marines, na personal niyang nahiling an aki kan presidente sa sarong harong sa Ilocos kan 2022.
Ipinaheling man niya sa pagdangog an sarong retrato nindang duwa na magkaibanan.
Kan hinapot ni Senador Imee Marcos an testigo kun may darang maleta sinda asin kun sisay an nag-ako kaini, asin sinabing si Representative Sandro Marcos suboot an nakaresibe kaini.
Afuera sa kongresista, kaiba man suboot sa mga testigo sa saindang mga alegasyon si dating senador Antonio Trillanes IV, na nakaresibe suboot nin kwarta.
Nakapaghatod suboot sinda nin sarong dakulang paper bag na igwang laog na P5 million hasta P6 million asin anom na maleta pa.
Siring man an mga maleta nin kwarta na hinatod man suboot sa harong ni dating House Speaker Martin Romualdez sa McKinley asin South Forbes Park sa Makati, kun sain 52 na maleta sa sarong harong sa McKinley, mantang 26 naman sa South Forbes Park.
