LEGAZPI CITY-Pigkalat kan mga miyembro kan Akbayan Youth an wanted poster kan pinagtutubudan nindang “international fugitive” asin “accused mass murderer” na si Senador Ronald “Bato” dela Rosa sa kahalabaan kan Kalayaan Avenue sa Quezon City ngonian na aldaw nin , Mayo 18, 2026.
Ini kasunod kan pig-isyung arrest warrant kan International Criminal Court (ICC) laban sa dating Philipine National Police (PNP) chief.
Nakalaag sa nasabing mga poster an mga katagang “WANTED” for crimes against humanity, Bato Dela Rosa surrender to the ICC now!”
Sa saro pang poster, nakalaag an mga contact number kan National Bureau of Investigation (NBI) asin ICC, ngani ipaaram sa sainda enkaso mahanap si Dela Rosa.
Sa saro pang pahayag, binatikos ni Akbayan Youth National Vice Chairperson Claire Lopez an padagos na pagporbar ni Dela Rosa na takasan an hustisiya, asin tinawan doon na rinibong pamilyang biktima kan extrajudicial killings (EJKs) an padagos na naghahalat nin hustisya.
Pigenganyar man kan grupo an publiko na makisumaro sa iniladawan nindang “people’s manhunt” kay Dela Rosa asin magtabang na masierto na madadara an dating PNP chief asin ngonian presenteng Senador na si Bato sa international justice mechanisms.
Susog sa Akbayan Youth, pigsasagibo ninda an nabanggit na aktibidad kasunod kan nangyaring kariribukan sa Senado kan nakalihis na semana, kun sain enot na nagpahiling si Dela Rosa sa publiko makalihis an pirang bulan na pagtatago para sumama sa leadership coup.
Inilaag man si Dela Rosa kan Senado sa kustodiya, makalihis na porbaran kan mga otoridad na i-serbi an arrest warrant laban sa saiya asin ngonian presenteng nagtatago sa tahaw kan kariribukan sa laog mismo kan Senado.
Mientrastanto, tinawan doon kan grupo an saindang pangapudan sa Senado na poonan an impeachment trial laban kay Vice President Sara Duterte, na duwang beses nang na-impeach sa Kamara.
