LEGAZPI CITY- Padagos an pigigibong monitoring kan Philippine Institute of Volcanology and Seismology (PHIVOLCS) sa bulkang Mayon na komon na nakakapagrehistro nin mga lava-collapse pyroclastic density current.
Segun ki Mayon Observatory Resident Volcanologist Doreen Abelinde sa intrevista kan Bombo Radyo Legazpi na maabot na sa 34.82 million cubic meters an lava flow sa bulkan.
Sa kabilugan man na volcanic materis na kumpwesto kan lava flow, lava collapse pyroclastic density current asin rockfall, pigkakarkulong maabot na sa 69.64 million cubic meters.
Dagdag pa kan opisyal na an pinakadakulang uson na nangyari kan Mayo 2 an nag-generate nin 4.6 million cubic meters na nasa lower slopes kan Mi-si gully.
Huli digdi, nagpagirumdom si Abelinde sa publiko na dae maglaog sa green lava o sa Mi-si channel huli ta pwedesir na abuton kan mga pyroclastic density current, na magigin peligroso para sa buhay kan publiko.
