LEGAZPI CITY-Inomaw kan Department of Tourism (DOT) an girl group na BINI asin an Filipino member kan global girl group na si Sophia Laforteza makalihis an saindang makasaysayang debut sa Coachella Valley Music and Arts Festival sa Estados Unidos.
Segun sa ahensya na naipahiling kan mga Filipino music artists an tibay sa ibang nacion sa paagi kan pinakadakulang music festivals sa kinaban, kun sain kaenot-enoting Filipino act an grupong BINI na nag-perform sa nasabing festival.
Tinawan doon man kan ahensya na nagpahiling ini nin mahewas na impluwensya kan musikang Pilipino sa global stage asin binisto an saindang ambag sa kultura, talento, asin identidad bilang mga Pinoy.
Bilang pagbisto, nagsangat si Negros Occidental 3rd District Rep. Javi Benitez nin House Resolution No. 930 ngani tawan nin honra an BINI sa pagigin enot na Filipino pop group na nakapag-perform sa Coachella.
Mientras tanto, padagos na pinag-oolayan sa international media an mga performances.
Nakatakda man na mag-perform an BINI sa Grammy Museum sa Abril 21, kun saen ipapabisto ninda an bagong extended play na may titulong “Signals.”
