LEGAZPI CITY-Pig-asigurar kan Legazpi City Water District (LCWD) na 95% kan ciudad an igwang bastanteng suplay nin tubig sa presente, sa tahaw kan pinaghahandaan huma kan Super El Niño sa maabot na mga bulan asin sa enot na bulan kan taong 2027.
Segun kay Legazpi City Water District General Manager Rico Salazar, sa intrevista kan Bombo Radyo Legazpi, na pinaghahandaan na ninda an “worst” na epekto kaini huli ta basado sa pagtatantya kan PAG-ASA nasa Super El Niño an kategirya kaini.
Kun magkakaigwa nin 36 million liters suboot kada aldaw para sa suplay nin tubig, na ngonian nasa 22 million liters, magigin bastante ini, orog na kadakol na mga sources an ciudad arog kan Yawa asin Pawa reefs.
Alagad pag-abot kan bulan nin Nobyembre, Disyembre, sagkod sa enot na bulan kan masunod na taon, magigin difisil suboot an pag-predict kan suplay, magin kan water distribution.
Sa ngonian, problema sana ninda iba pang mga pasilidad asin wara pang mga water distribution systems an nasa 12-13 barangay sa ciudad, kun kaya igwang mga water interruptions.
Sa presente, pinag-aantisiparan ninda an panghaluyang pangangaipo kan ciudad, asin pig-estimar na nasa 150 per liters an makokonsumo kan sarong indibidwal.
Basado sa computation na ini, pigsisierto nindang magigin bastante an suplay nin tubig, afuera sa ibang mga lugar na bako maayos an mga imprastraktura.
Kabale digdi an Barangay Buraguis, Puro, Dapdap, na kaipuhan nin pumping stations, asin Taysan kun sain mas halangkaw an elevation kaysa sa ibang lugar sa ciudad.
Padagos man an saindang paghahanap nin pondo ngani masusteniran an saindang proyekto manungod sa pagsasagibo nin maayos na water distribution systems.
