LEGAZPI CITY-Pigsierto kan Department of Energy (DOE) na bastante pa an suplay kan langis sa nacion sa laog nin humigit-kumulang 45 aldaw.
Segun sa ahensya na padagos an lakdang kan gobierno ngani madagdagan an buffer stock asin maibitaran an kakulangan sa suplay.
Basado sa datos kan Oil Industry Management Bureau (OIMB), an presenteng imbentaryo kan produktong petrolyo sa bilog na nacion, iyo an minasunod:
Gasolina – 53.14 aldaw
Diesel – 45.82 aldaw
Kerosene – 97.93 aldaw
Jet fuel – 38.62 aldaw
Fuel oil – 61.49 aldaw
LPG – 23.51 aldaw
Mientrastanto, sinabi man ni Energy Undersecretary Alessandro Sales na padagos na pigtutukan kan ahensya an suplay kan LPG ngani masierto na dai ini makulang.
Segun man kay Energy Secretary Sharon Garin na mabakal an gobierno sa paagi kan Philippine National Oil Company (PNOC), nin sarong milyon na bariles kan diesel na nagkakantidad nin P10 bilyon.
Alagad, aminado si Garin na an nabanggit na numero an katumbas sana nin haros sarong semanang konsumo kan nacion.
Sa presente, nasa 400,000 bariles na an naasigurar kan Philippine National Oil Company mantang piglalaoman pa an dugang na 140,000 bariles bago matapos an Marso.
Sinabi pa kan kalihim na kukuwaon an suplay hale sa manlain-lain na nacion, kabale digdi an hale sa Southeast Asia, ngani masierto an padagos na pag-suplay.
Tinawan doon pa niya na importante an pagbilog nin buffer stock maski pa limitado an kakayahan, huli sa dai makakatabang ini ngani masierto na dai mauubusan nin langis an nacion sa tahaw kan pankinabang krisis.
