LEGAZPI CITY – Bilang kasimbagan sa kasuguan ni Presidente Ferdinand Marcos Jr. na magtipid sa enerhiya huli sa tensyon sa Middle East, nagpa-otob nin protocol mapadapit digdi asin flexible work arrangement an Catanduanes State University.
Segun ki Catanduanes State University President Gemma Acedo sa intrevista kan Bombo Radyo Legazpi na ipina-otob ninda an apat na aldaw na onsite work kada semana para sa gabos nindang non-teaching personnel mantang flexible work asin work from home man tuyong biyernes sa ibang teaching personnel.
Paglilinaw niya man na kinakaipuhan kan mga nagsa-irarom sa flexible work arrangement na magsumite nin accomplishment report na magpapatunay na ginibo ninda an saindang trabaho tuyong biyernes.
Basado man sa saindang pagkakarkulo, dakula an saindang matitipid sa kuryente kun sasaraduhan tuyong biyernes an saindang unibersidad kun sain pwedesir ining umabot sa poco mas o menos 24 kilowatts.
Padagos man an pakikipag-koordinar kan opisyal sa saindang mga instructor nganing mapakaray an mga schedule kan mga estudyante asin mga kursong may laboratory class subjects siring na sana kan sa Architecture.
Dakulang tabang sa sainda an pigtugdok nindang solar farm nganing maka-menos sa paggamit nin petroleum products alagad nagtetenir na magabat an presyo kan gasolina sa provincia na pigpapadifisilan pa kan labing halangkaw na heat index.
Nagmamawot man si Acedo na dae na maglala an sitwasyon sa Gitnang Silangan nganing dae sinda mapiritan na iimplementar an online class mantang nakahanda man an saindang mga bus nganing tumabang sa saindang estudyante.
