LEGAZPI CITY-Ipinaliwanag kan Albay Electric Cooperative na posibleng magkaigwa nin halangkaw na singil sa kuryente sa rehiyon huli sa padagos na tensyon sa pagultanan kan Middle East asin Estados Unidos.
Segun ki Albay Electric Cooperative Spokesperson Anj Galero, sa intrevista kan Bombo Radyo Legazpi na posibleng maapektaran kaini an suplay asin civil cost sa kuryente bako sana sa rehiyon kundi sa gabos na electric cooperative sa nacion orog na kun nagkukuwa nin suplay sa Wholesale Electricity Spot Market o (WESM).
Huli digdi pinagaantisiparan an posibilidad na maglangkaw an generation cost sa kuryente sa rehiyon huli ta saro an ALECO sa mga kooperatibang nagkukuwa nin suplay sa WESM.
Paliwanag kan opisyal na enkaso nagkukuwa nin suplay an mga kooperatiba sa WESM asin apektado ini sa global disruption, posibleng maglangkaw man an singil sa sainda huli ta digdi nakabase an power supply.
Alagad, sa presente wara pa suboot na measurement kun pira an idadagdag huli ta saro pa sana ini sa mga posibilidad asin padagos pang pinagdidiskusyunan an relasyon asin potensyal na epekto kan tensyon sa middle east sa power prices sa Pilipinas.
