LEGAZPI CITY—Nagkukundusir ngunyan an Albay Electric Cooperative, Inc. (ALECO) nin preventive maintenance activities komo parte kan saindang contigency measures para sa super El Niño.
Segun ki Aleco Spokesperson Anj Galero, sa intrevista kan Bombo Radyo Legazpi, kasabay man digdi an pag-checkkan saindang ekipahes puon sa substations hasta sa makaabot sa mga lnya nin kuryente.
Nakaalerto man an saindang opisina sa magigin sitwasyon durante kan super El Niño asin en kaso man may concerns pwedesir nindang iakomodar ini sa paagi nin text message, pag-apod o maski sa formal letters.
Segun saiya na dae man basta-basta mahahali an unscheduled power interruptions durante kan super El Niño urog na ngunyan na nasa pagkumpleto sinda kan mga proyekto. Siring man na dae ninda aram kun nuarin maluwas an faults sa mga linya o iba pang mga bagay na nakakaapektar sa saindang mga pasilidad.
Pigdoon man ni Galero na padagos an saindang monitoring kaiba an iba pang ahensya sa suplay kan kuryente.
Naglalaom man sinda na dae masyadong makaapektar an super El Niño urog na sa national level, huli sa kun apektado ini an maaapektaran man an local electric cooperatives.
