LEGAZPI CITY – Sa ikaduwang pagkakataon, pinatawan liwat kan Kamara de Representantes nin duwang bulan na suspension si Cavite 4th District Representative Francisco Kiko Barzaga.
Sa boto na 238 pabor, 10 kontra, asin siyam na abstention, pormal na inadaptar kan plenaryo ngonian na aldaw an rekomendasyon kan House Committee on Ethics and Privileges.
Segun sa report kan committee, napatunayan na nagbalgar liwat si Barzaga sa House rules huli sa continued disorderly behavior kaini sa ibong kan epektibo pa an saiyang enot na suspension.
Partikularmenteng tinukoy kan Ethics panel an mga alegasyon ni Barzaga na nagkapirang miembros kan National Unity Party (NUP) an suboot nakaresibe nin suhol hale sa negosyanteng si Enrique Razon.
Afuera kaini, an mga pahayag kan mambabatas laban sa namaaram na Antipolo Rep. Romeo Acop an ginamit man na basehan kan saiyang suspensyon.
Sa saiyang report sa plenaryo, tinawan duon ni Ethics Committee Chairperson Rep. JC Abalos na an ikaduwang penalidad an huli sa escalating misconduct kan kongresista.
Huli sa desisyon, liwat na mawawaran nin deretsos si Barzaga na mag-atendir nin mga session asin committee hearing, asin dae man makakaresibe nin anuman na sweldo o allowance sa laog nin duwang bulan.
Magigirumduman na natapos pa sana ni Barzaga an enot niyang 60-day suspension kan Enero 30 na nag-ugat sa saiyang mga kontrobersyal na post sa social media.
Mientrastanto, dae pa nin pahayag an kampo ni Barzaga dapit sa panibagong desisyon kan Kamara.
