LEGAZPI CITY – Inaprobitsaran kan mga residentes an Mobile Registration na ikinondusir kan Commission on Elections sa Barangay Maslog, Legazpi City katakod kan Barangay and Sagguniang Kabataan elections ngonian na taon.
Segun ki Punong Barangay Niño Albert Berjuega sa intrevista kan Bombo Radyo Legazpi na dakulang tabang an Mobile Registration sa saindang mga residente partikularmente na an mga first time voters asin an mga mawot magpasalida kan saindang mga impormasyon.
Dae na man suboot po-problemahon kan saiyang kahimanwa an pamasahe huli ta ipigrani na kan Comelec sa saindang lugar an pagpaparehistro nganing magamit kan mga ini an saindang diretsos na pumili nin maray na lider poon sa Barangay sagkod sa National level.
Pigdoon niya man na pwedesir na igwang pagkukulang an mga opisyales kan Barangay enkaso hababa an porsyento kan botante sa ibong kan pagkakaigwa nin dakulang populasyon.
Pigtaram pa kan opisyal na padagos an saindang pakikipagtabangan sa mga ahensya kan gobierno nganing maray na maipa-otob an mga programang mawot nindang ikondusir sa saindang lugar.
Pagirumdom ni Berjuega sa saindang first time voters na pumili nin maray na lider sa mga maabot na pirilian urog nang sainda nakasalalay an magigin futuro kan nacion mantang nagpasalamat man siya sa Commission on Elections sa pagkokondusir nin Mobile Registration sa saindang Barangay.
