Kinumpirmar ni Senate Blue Ribbon Committee Chairperson Panfilo “Ping” Lacson liwat na mapuon an hearing sa Senado kan mga suboot anomalya sa flood control projects sa Enero 19.
Segun ki Lacson, mapuon ini nin ala-1 nin hapon. Kun saen, ididiskotir sa hearing an suboot pag-atras kan mga dating opisyal kan Department of Public Works and Highways (DPWH)-Bulacan na sinda Brice Hernandez asin Henry Alcantara sa saindang mga isinalaysay sa senado.
Dugang pa kan senador, mantang sinabi kan Department of Justice (DOJ) na warang pormal na isinagibong pagbawi si Alcantara sa saiyang mga ibinuyagyag suboot na anomalya sa proyektong pang-imprastraktura kan gobyerno sa isinagibong hearing sa senado kan Setyembre 2025, pag-uulayan man liwat kun ano an mga pwedesir na magin kapadusahan en kaso bawion kan mga nasabing dating opsiyal kan DPWH an saindang mga sinumpaang salaysay sa blue ribbon committee.
Tinawan-doon man kaini na lilinawon kan Senado sa DOJ kun nagsumiter kan saindang counter affidavit sa saindang binutasang mga taramon an mga dating opisyal kan DPWH. Kun saen, sienerto ni Lacson na hahalangkawan an magigin kapadusahan en kaso mapatunayan an pag-atras.
Mientrastanto, ipinaliwanag man ni Lacson na en kaso man na mag-atras sinda Alcantra asin Hernandez sa pagiging testigo an pwedesir man liwat na ipagpadagos an pigsasagibong imbestigasyon huli sa igwa pang ebidensya na makakapagtukdo sa mga dawit sa control projects siring kan money trail, may kinaaraman o konektado sa testimonya kan mga dating opisyal kan DPWH na pwedesir ikonsidera kan DOH o Ombudsman nganing imbestigaran.
Katakod kaini, ipapaapod kan ng blue ribbon committee sinda dating Department of Education (DepEd) undersecretary Trygve Olaivar, dating DPWH secretary Manuel Bonoan asin iba pang resource person na dae nag-atendir sa mga naenot na hearing asin papadarahann nin hearing asin papadarahan man nin subpoena ang mga dae liwat na maatendir.
Mantang pigiisipan man kun iimbitaran sa hearing si Batangas 1st District Representative Leandro Leviste katakod kan paglalantad kaini kan nasabing “Cabral files”.
